迪科爾1.7億重投熱刺
資料來源 : 路透社 -- 7 Jan '09
迪科爾重返熱刺！近排一直盛傳希望離隊o既樸茨茅夫射手迪科爾，尋日終於落實以一千五百萬鎊重返熱刺。其實迪科爾一年前先由熱刺轉會樸茨茅夫，今次重返白鹿徑球場，好大程度係想追隨恩師夏利列納。

英國傳媒透露，其實熱刺主席利維近日一直同樸茨茅夫行政總裁史杜利商討有關迪科爾o既轉會費，最終大家取得共識，落實以一千五百萬鎊交易。樸茨茅夫o系官網已經確認轉會，外間預計熱刺將o系迪科爾完成體測後，正式宣布呢單收購。

其實迪科爾今次重返熱刺，好大程度歸功於夏利列納，話說夏利列納o系上年一月仲教緊樸茅o個陣，收購當時o系熱刺失去正選o既迪科爾，結果之後令迪科爾重生，難怪夏利列納執教熱刺後，迪科爾立即不計前嫌，重返熱刺救亡。

至於正o系杜拜備戰o既漢堡，o岩o岩成功同贊助商阿聯酋航空續約，o黎緊三年合共將會獲得二千一百萬歐元，同時佢o地亦o系當地同拜仁密斟，希望畀前鋒奧歷今個月就去拜仁，換取以超筍價七百萬歐元收購普多斯基，如果成事o既話，漢堡呢次杜拜之旅收穫認真大。

泰維斯送皇馬秋波辣費Sir
資料來源 : 路透社 -- 7 Jan '09
泰維斯聲言想踢皇家馬德里，擺明向費Sir宣戰！曼聯遲遲未落實正式簽下泰維斯，令呢位阿根廷球星非常冇癮，近期有傳媒話佢獅子開大口影響談判進度，佢不甘被屈發錢寒，忍唔住踢爆球會根本冇同佢傾過，仲大膽到話會考慮加盟費Sir仇家皇馬。此言一出，唔知老費會唔會嬲到擺佢入雪櫃呢？

早前費Sir表示曼聯會同泰維斯傾合約，其後傳出泰維斯要求天價周薪，呢位當事人馬上作出澄清：「球會成日話同我傾，到依家都未有聲氣，我何來有機會拒絕？我冇要求C朗或者朗尼份人工，呢件事球迷一定要知，因為我好尊重佢o地。」泰維斯話自問交足功課，深得球迷歡心，難明點解球會漠視佢訴求。

有西班牙傳媒問泰維斯有冇興趣去皇馬，佢好興奮咁表示：「有邊個球員唔想踢皇馬？佢o地同曼聯一樣係世界其中一間頂級球會，若然能夠為皇馬效力，肯定係我o既榮幸。」之前費Sir因為C朗轉會傳聞同皇馬交惡，雙方勢成水火，依家泰維斯竟然夠膽向阿頭死敵送秋波，咁鬼多口，睇怕要同後備席講「再坐一會」喇！

大菲被炒熱到封盤
資料來源 : 路透社 -- 7 Jan '09
根據英國博彩公司William Hill發言人格拉咸沙柏所講，佢o地近排不斷收到大注買史高拉利會係下個被炒o既英超領隊，就算賠率由51倍跌到落11倍都未停過，佢o地擔心係內幕消息，決定封盤！

國米踢走阿祖傳曼城冒險收留
資料來源 : 路透社 -- 6 Jan '09
巴西麻煩友阿祖安奴畀國米「阿根廷幫」迫害，隨時遠走投奔曼城？國際米蘭同阿祖安奴o既「孽緣」糾纏o左咁耐，隨住以辛尼迪、基斯普同告魯斯為首o既阿根廷勢力聯手出招，大有機會o系今個月以「分手」作為結局。不過國際米蘭表明絕對唔會將佢賣畀意甲對手，盛傳曼城有意冒險接收呢位麻煩友，等佢有機會o系英超展開新一頁。

國際米蘭領隊莫連奴唔妥阿祖安奴已經唔係新聞，呢位巴西前鋒新年第一課操練又再遲到後，令雙方惡劣關係走向最極端。據意大利《全體育》爆料，國際米蘭日前內部召開會議，就阿祖安奴係咪適合繼續留低作出決議。結果隊長辛尼迪帶頭反對阿祖安奴留隊，一班「阿根廷幫」基斯普、甘比亞素、告魯斯同森美爾自然齊齊和應，結果多數球員都認為阿祖安奴「早走早著」。

辛尼迪發表立場o個陣話：「阿祖安奴的確係個好球員，但國際米蘭唔應該容納破壞集體利益，而且為其他人造成麻煩o既球員。」辛尼迪早o系零五年歐聯對阿積士一仗，幾乎同阿祖安奴場上開拖，零六年阿祖安奴又同華朗o系更衣室打交，「阿根廷幫」對阿祖安奴早有不滿，尤其係如果佢被踢走，基斯普同告魯斯o既上陣機會就會增加，今次當然唔放過拔走眼中釘o既機會。

阿祖安奴失勢o既主因，就係會長莫拉堤o既容忍似乎到o左極限，球會日前宣布就阿祖安奴操練遲到重罰佢十五萬歐元（約一百六十萬港元），有消息話莫拉堤已經決定將佢賣走，不過只限於海外球會，英超o既曼城就成為熱門落腳地。據報如果曉士買唔到頭號目標辛達告魯斯，就會冒險買入阿祖安奴博一鋪！

曼聯晉級英足總盃第四圈
資料來源 : 路透社 -- 5 Jan '09
英超曼聯作客以3:0擊敗英冠修咸頓，韋碧克上半場20分鐘，替曼聯取得領先優勢。蘭尼及後備入替的吉遜下半場分別入球，協助曼聯擴大比分。

C朗再贏美斯膺歐洲最佳
資料來源 : 太陽報 -- 5 Jan '09
C朗拿度又再奪獎！這位曼聯翼鋒最近被烏拉圭《國家報》選為零八歐洲最佳球員，得獎者是由拉丁美洲媒體共同投票選出，C朗拿度以七票之差力壓巴塞隆拿的美斯當選。至於歐洲最佳教練由曼聯主帥費格遜自九九、零零及零三年後第四度當選。

曼城千二萬鎊買布歷治成笑柄
資料來源 : 東方日報 -- 5 Jan '09
曼城一沉百踩，不但恥辱輸波，o系轉會市場高價購入布歷治，仲畀阿士東維拉領隊奧尼爾直斥佢o地係水魚。奧尼爾寸到暈，話如果布歷治都值一千二百萬鎊，維拉主將艾舒利楊格就值七千五百萬鎊，曼城呢鋪真係乜面都冇晒！

曼城季前豪花超過三千萬鎊買入羅賓奴，都算合理，如今一月轉會市場重開，竟然斥巨資於車路士「三號左閘」身上，就令人失笑。奧尼爾話：「曼城係好有錢，佢o地矢志以金錢換成績，超級富豪o既加入，的確改變o左世界球壇遊戲規則。雖然佢o地有錢o者，但都要用得其所o丫，老實講布歷治年紀唔輕，又缺乏比賽狀態，曼城都肯出咁高價錢收購，好唔理智囉！如果曼城係咁將球員身價推高，我認為艾舒利楊格真係值七千五百萬鎊！」

AC米蘭友賽漢堡碧咸將上陣
資料來源 : 商業電台 -- 4 Jan '09
意甲球隊AC米蘭的教練安察洛堤說，借用到球隊的碧咸，將於星期二友賽德國漢堡時上陣；AC米蘭本月十一日對羅馬的聯賽，碧咸亦可能有份出場。三十三歲的碧咸曾表示，在意甲比賽，有助他保持狀態，並實現他在頂級賽事上陣的夢想。

足總盃利物浦挫普雷斯頓
資料來源 : 商業電台 -- 4 Jan '09
英格蘭足總盃第三圈，利物浦作客冠聯的普雷斯頓，贏二比零晉級。利亞拿在二十五分鐘先開記錄，費蘭度托里斯在補時階段射成二比零。

阿仙奴主場三比一擊敗冠聯的普利茅夫，雲佩斯梅開二度；車路士被甲組的修安聯，在臨完場前迫和一比一，需要擇日重賽；曼城作客冠聯的諾定咸森林，大敗零比三出局；甲組的哈特普爾憑下半場兩個入球，爆冷二比零擊敗史篤城。

曼聯1.83億購杜錫利亞積
資料來源 : 蘋果日報 -- 3 Jan '09
曼聯終在冬季轉會市場出手！該隊在周五正式完成與塞爾維亞球會柏遜的交易，收購一對攻擊球員杜錫及利亞積。據英國《每日郵報》報道，曼聯以1,630萬鎊完成該項收購行動。其實曼聯早對杜錫及利亞積有意，當中有「小卡卡」之稱的利亞積更曾於早前到曼聯跟操試腳。年僅17歲的利亞積雖有能力，但據悉他會在餘下球季借回柏遜吸收經驗。至於21歲司職左翼的杜錫，預料他會是頂替老將傑斯的最佳人選。

熱刺率先晉級英足總盃第四圈
資料來源 : 商業電台 -- 3 Jan '09
英格蘭足總盃第三圈賽事展開，熱刺３比１擊敗韋根，率先晉身第四圈三十二強。兩隊半場踢成零比零，到五十二分鐘，熱刺憑柏夫尤真高射入十二碼打破僵局，缺少一對正選箭頭沙基及希斯基的的韋根，無力平反敗局，再被熱刺的摩迪，在七十六分鐘門前頭槌頂入，到完場前，韋根由亨利卡馬拉破蛋，不過熱刺隨即由柏夫尤真高再入一球，贏３比１晉級。

曼城收購車路士後衛布歷治
資料來源 : 商業電台 -- 3 Jan '09
英超車路士左後衛布歷治，可望加盟另一支超聯球會曼城，曼城領隊曉士說，會與布歷治斟洽個人條件，明日進行體測，以確定轉會，兩支球會未公布轉會費，有報道指價值過一千萬鎊。布歷治為英格蘭上陣三十二次，零三年以七百萬英鎊轉會車路士，但艾殊利高爾零六年加盟車路士後，布歷治失去正選位置。

另外，同樣傳會被車路士出售的前鋒杜奧巴，將會在周末的足總盃對修安聯，聯同多名副選球員上陣。

英超前鋒走得都走 奧雲魔獸意國搵米
資料來源 : 東方日報 -- 2 Jan '09
新年新願望，唔少人都係想賺大錢，對於奧雲同杜奧巴兩大射手，都肯定係搵「米」至上！尋日冬季轉會市場重開，即刻消息滿天飛，最轟動肯定係國際米蘭同前金球獎得主奧雲扯上關係，據聞交易快將落實。英格蘭國腳奧雲同紐卡素將會o系今夏約滿，之前雙方一直未能就續約問題傾掂數，奧雲表面就話等季尾先傾，實質唔通有舊肥豬肉送到埋口，佢會唔要咩？根據英國《太陽報》報道，對國米前鋒球員表現不滿o既教練莫連奴，已經獲得班主莫拉堤首肯，為簽下奧雲盡最大努力。

消息話，國米已經向「喜鵲」提供o左兩套方案，其一係直接用奧雲交換有紀律問題o既阿祖安奴，否則亦可以用奧雲去換o黎已經外借去賓菲加o既洪都拉斯國腳蘇亞素，另加四百五十萬鎊現金。事實上，只要換得奧雲，國米可以話係願意不惜一切去達成，事關上月中先踏入二十九歲冇耐o既奧雲，今季雖然仍不斷受到小傷患困擾，但論整體表現，為紐卡素上陣十八場入九球，依然係一個入球o既保證。

數臭藍戰士成箭靶 杜奧巴米蘭站落車
資料來源 : 東方日報 -- 2 Jan '09
杜奧巴前途亮起紅燈！早前公開批評車路士o既杜奧巴，被球會罰款十萬鎊，導致勞資關係緊張，更引發佢開會時被其他隊友批判，萬箭穿心，令佢非常冇癮。據聞「契爺」莫連奴已正式介入，準備為國際米蘭撬走呢位頭號愛將，今次事件隨時成為杜奧巴同車仔分手導火線！

杜奧巴早前向傳媒大數車路士不是，仲列出球會「四宗罪」，引來行政總裁簡容及隊友不滿，事件更驚動正在外遊o既大老闆阿布拉莫域。車路士高層開會研究後，決定殺一儆百，嚴懲杜奧巴，扣起佢一周薪水，即係十萬鎊。

雖然十萬鎊對杜奧巴o黎講濕濕碎，但一向愛面子o既佢，知道被球會罰錢後非常不滿，仲話對足球已失去興趣，唔排除完成最後一年合約後離隊，甚至掛靴。杜奧巴表示：「我自細同祖母生活，佢今年去世令我好傷心，當時球會冇派包機送我返祖家，我覺得球會唔支持我。」

杜奧巴亦批評領隊史高拉利用人方針：「自從我傷愈之後，一直擔任後備，令我o既狀態遲遲未操起，領隊永遠用單箭頭，令我冇機會落場。」杜奧巴出名口多，但今次佢鬧得就鬧，引起好多車路士隊友不滿，好多球員o系開會時都直指杜奧巴唔o岩，呢位科特迪瓦國腳犯眾憎，睇o黎o系車路士o既日子已進入倒數階段！

有見及此，杜奧巴契爺莫連奴帶領o既國際米蘭已準備乘虛而入，以阿祖安奴作為籌碼，向車路士提出交換杜奧巴。其實莫帥加盟國米後，已即刻同杜奧巴聯絡，希望再度同佢合作，不過當時杜奧巴受傷患困擾，車仔唔放人態度又決絕，最終先唔成事，依家杜奧巴同車仔搞成咁，而阿祖安奴於國米又唔如意，車仔主帥史高拉利又對巴西同鄉阿祖安奴有興趣，相信只要傾掂價錢，呢宗轉會就可以水到渠成。

曼城啟動六千萬鎊收購大計
資料來源 : 東方日報 -- 2 Jan '09
轉會市場重開，球迷o既目光肯定會放o系曼城身上。呢支「突然富貴」o既曼市球會冇o野多，錢就最多，預期今個月將會「入市」瘋狂掃貨，據英國傳媒o既最新消息透露，曼城無懼全球金融困境，逆市下啟動六千萬鎊o既收購大計，燒錢行動正式開始！

隨住羅賓奴o系季初來投，曼城話畀球迷知冇o野係冇可能，而由於球隊家陣o既成績唔見得人，老闆文梳亞決定再擲千金，搥成六千萬鎊出o黎畀領隊曉士擴軍，首要任務就係重建脆弱不堪o既後防，羅致目標直指車路士左閘布歷治。

呢位英格蘭國腳o系車仔坐多過踢，加上一場金融海嘯令「阿布」份身家蒸發o左唔少，曼城提出一千萬鎊o既收購建議話唔埋會打動到「阿布」放人。日前有消息指出，兵工廠o既高路托尼唔妥加拿斯，並且已經要求離隊，一千萬鎊左右o既身價對於曼城老闆o黎講只係小數目，成事機會亦相當高。

另外，曼城另一個重點收購就係辛達告魯斯，據報佢o地將會以一千七百萬鎊o既天價撬走呢位布力般前鋒。至於紐卡素門將基雲、拜仁左閘拿姆、韋斯咸孖寶比拿美同柏加亦係曉士o既心頭好。