曼聯五比零大勝樸茨茅夫
資料來源 : 路透社 -- 7 Feb '10
英超聯賽，曼聯主場大勝榜尾的樸茨茅夫五比零。紅魔鬼上半場四十分鐘，由朗尼門前接應罰球頂入，拉開大勝序幕，完半場前蘭尼近門施射，皮球射中對方球員，改變方向入網。換邊後，卡域克勁射，皮球省中李察曉士改變方向入網，貝碧托夫之後建功，加上樸茨茅夫的威爾遜擺烏龍，令曼聯淨勝五球，得56分，以1分壓過車路士，暫時升上榜首。

曼城就作客一比二不敵侯城；般尼主場贏韋斯咸二比一，由賽前的十九位，升上十五位；史篤城三比零擊敗布力般流浪；新特蘭與韋根賽和一比一；保頓與富咸互無紀錄。

泰利被撤去英格蘭隊長資格
資料來源 : 路透社 -- 6 Feb '10
英格蘭足總官員表示，捲入婚外情醜聞的車路士隊長泰利，被撤去英格蘭國家隊隊長資格。官方透露，英格蘭國家隊領隊卡比路，在溫布萊球場與泰利見面時，向他表示希望更換隊長。泰利早前被揭發，與車路士前隊友布歷治的前女友有染，事件令他形象受損。

而泰利的誠信再受質疑，涉嫌違規分租自己在溫布萊球場的包廂。每日電訊報派記者追查，獲邀以四千英鎊租用泰利名下的十二席包廂，觀看下月英格蘭對埃及的友賽。泰利兩年前開始租用有關包廂，合約訂明不能分租。泰利發言人表示，早已將包廂運作交由一間公司處理，並無違規。

AC震怒最後警告細哨
資料來源 : 路透社 -- 4 Feb '10
「細哨」朗拿甸奴再次成為AC米蘭高層煩惱，呢位巴西球星被踢爆於上月米蘭打o比前連蒲三晚，因而辣「興」副會長加利安尼，後者仲向佢發出嚴厲警告，如有再犯就會即時拜拜！

朗拿甸奴早排表現醒神，但呢位球星始終改唔到爛蒲惡習，上月尾鬥國米場大戰前流連當地名牌酒店套房，玩足三晚豪使七萬五千歐元，真係死性不改。

「細哨」玩到腳仔軟，o系打o比戰冇貨交之餘仲要射失十二碼，結果AC輸波並被國米擴大領先優勢，令會方極度不滿。意國傳媒收到消息後，馬上追訪AC副會長加利安尼，得到答案係一切屬球會內務，唔會作出評論。不過，有傳加利安尼其後殺入更衣室捉朗拿甸奴「照肺」，仲嚴重警告佢話今次係最後機會，唔似玩玩o下，「細哨」如果唔想執包袱o既話，就好心生性o的啦！

英超經濟泡沫隨時爆破
資料來源 : 路透社 -- 3 Feb '10
歐洲冬季轉會市場進入大蕭條！為期1個月o既轉會窗尋日凌晨關閉，一眾歐洲豪門交投出奇淡靜，英、西、意、德、法5大聯賽上月合共僅花近1億2,000萬歐元，比起上年同期勁跌62%！當中富甲一方o既英超同西甲更係重災區，經濟泡沫隨時爆破！

英超係全球資本家樂園，每逢轉會市場重開，例必狂燒銀紙掃貨，點知今季Big5閂水喉，買唔起球星改買新仔，基斯史摩寧、阿當莊臣分別以800萬歐元加盟曼聯、曼城，竟然齊齊成為標王，結果英超冬季引援只係用o左3,570萬歐元，比上季插水式狂瀉81%，創出近12年新低！

上季英超冬季引援總支出1億8,552萬歐元，暴發戶曼城買o左比拿美、尼祖迪莊、布歷治同基雲，以為捱過金融海嘯，佢o地會掟更多錢買人啦，最後竟然斟唔掂皇馬中場加高，只係用800萬歐元（約8,600萬港元）收購米杜士堡22歲翼鋒阿當莊臣，死對頭曼聯亦五行欠水，同樣用800萬歐元轉會費，羅致富咸20歲後防基斯史摩寧算數。

至於Big5之一o既車路士，今個冬季「零收購」，阿仙奴就免費簽番中堅蘇甘保，利物浦借用馬體會中場麥斯洛迪古斯，都係集體閂水喉跡象。至於上年冬季瘋狂買人o既熱刺，今年就向摩納哥借用前鋒古莊臣，同平價收購樸茨茅夫中堅卡保奧，仲要將隊長羅比堅尼借去些路迪，睇得出英超豪門個個得個殼，銀彈有限，富貴不再。

朗尼入波過20冠絕5大聯賽
資料來源 : 路透社 -- 2 Feb '10
曼聯周一擊倒阿仙奴，朗尼更取得o系英超第100個「士哥」，成為今季為止，歐洲5大聯賽唯一入波突破20大關o既球員，問鼎歐洲金靴獎在望。

朗尼認真係阿仙奴剋星，02年處子戰對兵工廠取得英超首個入波，日前對阿仙奴又取得士哥，用o左247場就成為英超史上第18位取得100球o既球員，比傑斯o既534場，快o左287場達標。其實朗尼今季弗到漏，暫時o系英超入20球，成功超越安歷卡上季o既紀錄。同時環顧目前歐洲5大聯賽，朗尼亦係首位入波數字o系2字頭o既球員。

如果計埋其他賽事，朗尼今季更已累積22球，前季C朗o系曼聯射入42球，o系呢個時候都係入得19球，可見朗尼入波效率驚人，難怪早前有傳巴塞同皇馬都準備向財困o既曼聯提出收購朗尼。

另外，阿仙奴對曼聯係英國首次全球使用3D直播，可惜毀譽參半，一名71歲o既阿仙奴球迷批評：「近鏡冇得頂，但遠o既角度就冇想像中咁細緻。」

曼聯3:1終止阿仙奴10場不敗
資料來源 : 路透社 -- 1 Feb '10
憑藉拿尼一傳一射的精彩演出，曼聯今晨以3:1作客殺敗阿仙奴，終止兵工廠連續10場聯賽不敗走勢。贏波後的紅魔鬼暫以53分位列次席，落後「一哥」車路士1分但多踢1場；至於曼城則於昨晚早場輕取樸茅2:0升上第6位。

「阿曼大戰」雙方互有攻守，表現活躍的拿尼於上半場33分鐘擺脫3名兵工廠守將後，以一記似傳非傳的高波笠死艾蒙尼亞，為曼聯打破缺口。4分鐘後拿尼妙傳朗尼，後者燙射成2:0，這個入球更是朗尼於英超的第100個「士哥」。之後朴智星單刀為曼聯擴大比數至3:0，阿仙奴雖由華美倫破蛋回敬1球，奈何為時已晚，最終曼聯贏3:1。

至於剛被曼聯踢出聯賽盃的曼城，昨晚重整旗鼓搵樸茨茅夫出氣，他們有踢罷非國盃的高路托尼披甲，艾迪巴約亦重返正選行列。戰至上半場35分鐘，薩巴列達撞爆鼻樑被送出場治療，樸茅隨即向10人應戰的曼城施襲，奈何雲丹波里的射門卻中楣底彈出。

大難不死的曼城及後即有斬鑊，艾迪巴約接應艾利蘭的長傳，突破越位陷阱射破占士十指關，替主隊先拔頭籌。補時階段，高柏尼接應角球頭槌破網，助曼城領先2:0返回更衣室。換邊後樸茅積極反撲，可惜巴斯拿斯、韋伯白白錯失破蛋良機，結果曼城維持2:0勝局。

柏度上位巴塞新三叉戟面世
資料來源 : 路透社 -- 1 Feb '10
提到巴塞隆拿前鋒三叉戟，以往都係指美斯、伊巴謙莫域及亨利，但隨住柏度洛迪古斯o系周日凌晨建功助巴塞以1:0擊敗希杭後，意味新三叉戟正式成立！因為呢位新星今季拍住美斯同伊巴謙合共攻入50球，火力比上一代有過之而無不及，難怪亨利都心甘情願退居後備席！

自從柏度洛迪古斯火速冒起後，巴塞大部分時間都以佢取代亨利，聯同美斯及伊巴謙攻堅。事實上，呢個新前鋒組合表現唔錯，巴塞周日凌晨o系西甲作客出擊，正正係靠柏度洛迪古斯一箭定江山小勝希杭，呢個入波亦係巴塞新三叉戟今季所入o既第50球添！

雖然眼見後輩超越自己成為主力前鋒，不過亨利並無眼紅柏度洛迪古斯，仲大讚對方：「柏度洛迪古斯表現確係出色，我願意成為佢o既後備，兼且希望佢足球事業發展順利。」只係有傳亨利收咧後會轉投美職聯紐約紅牛，怕且做後備o既日子都唔耐！

教授信蘇甘保嘜到朗尼
資料來源 : 路透社 -- 31 Jan '10
中堅華美倫養傷，阿仙奴被迫以老將蘇甘保頂上，唔少球迷都擔心後者未必「嘜」得住速度銳利o既朗尼，不過兵工廠領隊雲格就搶先為蘇甘保減壓，話明一切係睇球隊表現而非個人，仲話佢反而擔心朗尼會插水，認真識玩心理戰。

雲格表示：「我唔想將一場大戰焦點放落個人對決身上，其實球隊打得好，控球在腳多，朗尼咪入唔到波囉！假如球隊打得差，蘇甘保梗會有麻煩o架！」「教授」仲話至今都未忘記04年阿仙奴畀曼聯打破49場不敗o個陣，朗尼插水博到12碼：「毫無疑問朗尼係充滿天分，不過所有前鋒都一樣，會o系踢法聰明同插水之間徘徊。」

同樣對紅魔鬼有段不快回憶，仲有阿仙奴中場法比加斯，上季佢賽和曼聯後睇住對手封王，仲要走去親口祝賀曼聯領隊費格遜，呢種感覺法比仔始終無法忘記：「要承認對手好過自己真係唔容易，上季我試過同佢（費格遜）講恭喜，話冠軍係佢值得o既，今次我希望佢都會祝賀番我，因為咁樣即係我o地係勝出一方。」

紅魔1.5億購基斯史摩寧
資料來源 : 路透社 -- 28 Jan '10
「新里奧費迪南」下季加盟曼聯！廿歲富咸後防基斯史摩寧，一年半前仍踢緊英格蘭第七級別地區聯賽，寂寂無聞畀人當爛泥，轉投富咸唔使十萬鎊；但有料定有出頭天，前日曼聯、阿仙奴就為佢展開追逐戰，最後基斯史摩寧情傾紅魔鬼，轉會費高達八百萬鎊，身價狂飆超過八十倍，絕對係山雞變鳳凰！

基斯史摩寧身高１米94、身材健碩，速度高、腳法好，踢法非常瀟灑，又係英格蘭人，故被譽為新版里奧費迪南。但佢卻較為「遲熟」，九歲踢波後投考過多間球會青年軍，都被拒諸門外。十六歲被米禾爾趕扯後，基斯史摩寧死死氣加入地區聯賽，效力梅德斯通聯。加盟後佢愈踢愈好，完全超晒班下被捧上「妖人級」，比賽十二場就被富咸挖角，身價唔夠十萬鎊，領隊鶴臣的確有眼光。

雖然富咸後防齊晒腳，但基斯史摩寧天才橫溢，去年五月首次於英超出場。本季佢得到更多機會，於歐霸賽事嶄露頭角，而去年尾富咸聯賽作客車路士，基斯史摩寧首次於英超正選出場，雖然擺烏龍累球隊輸波，但賽後仍被鶴臣大讚有前途。

里奧費迪南本季傷多過踢，而費格遜又有意今夏放走尼曼查維迪，係時候尋覓新一代後防「渣」弗人。雖然阿仙奴同樣報價八百萬鎊，但基斯史摩寧卻不願「入廠」，寧願化身紅魔鬼。兩大超級球會都爭，基斯史摩寧潛質無限，除可接收里奧曼聯正選位置外，相信亦大有機會成為未來英格蘭後防大杉！

羅賓奴外借山度士快成事
資料來源 : 路透社 -- 27 Jan '10
扭計離隊o既曼城球星羅賓奴，外借山度士一事進展迅速，據報該巴甲球會已經正式同曼城展開商討，預計借用期長達18個月，山度士會畀曼城一筆借用費，惟羅賓奴o既周薪會由15萬鎊減到10萬5,000鎊，當中35,000鎊會由山度士贊助商畀錢，其餘就會由曼城支付。

曼聯5億新約留朗尼
資料來源 : 路透社 -- 26 Jan '10
曼聯前鋒朗尼早已引來皇馬及巴塞等勁旅青睞，紅魔為求留住愛將打算開出一份為期5年兼總值4,000萬鎊新約！只要朗尼答應，新約的15萬鎊周薪將會令他成為球會史上最高薪球員，另外里奧費迪南因為上仗與侯城前鋒法根衝突，可能面對英格蘭足總行為不檢的指控。

伊度奧誓報上屆兩敗之辱
資料來源 : 路透社 -- 25 Jan '10
上屆非洲國家盃決賽，喀麥隆以0:1不敵埃及，今屆兩隊o系8強狹路相逢，可以話仇人見面，為o左唔想排陣、戰術秘密外洩，佢o地o既賽前操練都拒絕對方記者採訪，作為喀麥隆隊長o既伊度奧仲話明，今次一定要砌低埃及至肯罷休！

喀麥隆o向上周六o既操練，謝絕所有埃及記者採訪，另方面，埃及日前練波亦唔准喀麥隆傳媒入場，原因好簡單，兩隊都唔想o系上屆決賽翻版戰前，揭開底牌任人睇，尤其係喀麥隆o系上屆分組賽，先以2:4慘負埃及，決賽再遇又輸0:1，今次碰頭自然想報仇。

效力國際米蘭o既喀麥隆射手伊度奧咁講：「兩年前，埃及擊敗過我o地，包括o系決賽，呢次輪到我o地贏波！我o地準備充足，目標絕對唔止係8強。」不過，埃及隊長阿密特哈辛上場對貝寧第169次代表國家隊上陣，今場會打破紀錄，成為埃及史上出場次數最多球員，肯定唔會輕易畀伊度奧得逞。

雲尼斯達來轉投漢堡
資料來源 : 路透社 -- 24 Jan '10
皇家馬德里的荷蘭前鋒雲達斯達來轉投德甲的漢堡，簽約一年半。三十三歲的雲尼斯達來先後效力燕豪芬及曼聯等勁旅。他在零六年加盟皇馬以來，上陣六十八場，取得四十六個入球。但上季接受膝部手術後，大部份時間缺陣，對上兩個月亦因為肌肉受傷而倦勤。

泰維斯插加利佬係擦鞋仔
資料來源 : 路透社 -- 23 Jan '10
早前英聯盃四強首回合「曼市風雲」，加插曼聯後衛加利尼維利向舊隊友泰維斯出示「中指」事件後，泰維斯進行反擊戰，承認自己當時入波慶祝，的確係衝住加利仔而來，因為覺得對方係擦鞋仔。

泰維斯話：「我以前冇得罪過佢，但自從決定離開曼聯後，佢立即當我係仇人，話我唔值二千五百萬鎊，依家又對我做出不文手勢，佢咁做都係為討費格遜歡心，係名副其實o既擦鞋仔。」泰維斯更揚言如果佢次回合入波實會大事慶祝。

費格遜當選近14年最佳主帥
資料來源 : 路透社 -- 23 Jan '10
國際足球歷史及數據統計聯合會評選出近十四年世界最佳主帥，曼聯領隊費格遜力壓意大利國家隊領隊納比及阿仙奴領隊雲格，獲得世界首席教頭殊榮。費Sir毫不吝嗇同大家分享成功之道，就係八個大字：「順我者昌，逆我者亡。」

費格遜可以執教曼聯長達二十三年，而且戰績彪炳，全因自己完全控制球隊：「由執教鴨巴甸開始，我已明白鐵腕管理球隊o既重要性，身為曼聯領隊，如果我唔可以控制陣中一班天王巨星，我好可能一早已經要走人。因此我必須擁有絕對權力及控制力，一定唔會令球隊失控，如果有球員唔聽我話，佢一定死梗。」

費Sir絕對唔係靠嚇，近十年因為逆佢意而被踢走o既球星比比皆是，碧咸、堅尼、史譚及雲尼斯達萊就係最佳例子。據悉，拿尼早前因為激嬲費格遜，而被佢折磨，除o左雪藏呢位中場之外，甚至將佢邊緣化，包括球隊聚餐唔請佢。因此，想o系曼聯有餐安樂茶飯食，第一件事就係討好費Sir。