禾確特受傷英足總或需賠巨額
資料來源 : 商業電台 -- 21 Nov '08
阿仙奴前鋒禾確特隨英格蘭代表隊備戰時受傷，估計休養三個月，英格蘭足總因此可能要賠償一百五十萬英鎊予阿仙奴。英格蘭足總承諾，球員在被徵召期間受傷，養傷首兩個星期會賠償五萬鎊，其後每星期十萬鎊。以禾確特預料倦勤十六星期計，足總要賠償約一百五十萬鎊。但阿仙奴領隊雲加說，仍未決定是否索償，而且受傷在日常操練都會發生，他並無埋怨英格蘭足總。

朗拿度可能提早退役
資料來源 : 商業電台 -- 21 Nov '08
32歲的巴西前鋒朗拿度可能提早掛靴，他今年二月為AC米蘭披甲時左膝受傷，養傷至今，日前參加慈善賽，但亦祗能上陣二十二分鐘，他與AC米蘭的合約經已屆滿，但他拒絕另一支意甲球隊錫耶納的加盟邀請，他說，目前仍未決定去向，可能繼續比賽，亦可能退役，會在明日或一個月後作出決定，他說，由於康復工作艱巨，目前感到疲累，雙腳亦好沉重。

皇馬搵基斯普頂雲佬
資料來源 : 東方日報 -- 17 Nov '08
皇家馬德里危機日深！繼上周中西班牙盃主場被丙組仔踢出局後，「銀河鑑隊」前晚西甲作客華拉度列輸零比一，除全失三分外，更係八個月來首次於聯賽食白果，可見雲尼斯達萊提早收咧影響極大，為解決危機，皇馬打算引入於國際米蘭長坐冷板o既阿根廷射手基斯普救亡！

皇馬前晚對華拉度列於下半場開波僅三分鐘即失守。其後傾力反撲不成，完場前更有守將軒斯被逐，最後輸零比一，係上季三月中對拉科魯尼亞後，八個月以來首次於西甲食白果！連續入波紀錄中斷，絕對與雲尼斯達萊收咧有關，有傳皇馬打算羅致前鋒填補空缺，可惜主要目標阿馬利已遭所屬o既祖雲達斯列為非賣品，惟有轉斟國際米蘭大後備基斯普，一來佢經驗豐富，亦與雲佬一樣同屬機會主義者，二來可以代表皇馬踢歐聯，三來國米主帥莫連奴願意放人，消息更指基斯普經理人伊達爾戈已動身前往馬德里商討轉會。

老費出自傳袋二千萬
資料來源 : 東方日報 -- 17 Nov '08
引致曼聯領隊費格遜同碧咸決裂o既「飛砵之謎」，即將解開！費Sir準備出新書，大爆入行五十年以來同各方o既恩怨情仇，包括佢同碧咸夫婦之間糾纏不清o既關係，到底事件背後誰是誰非？答案會否出人意表？實在令人期待，唯一肯定係費格遜可以從呢本新書穩袋二百萬鎊報酬，成為大贏家。

曼聯五球淨勝史篤城
資料來源 : 商業電台 -- 16 Nov '08
英格蘭超級足球聯賽，曼聯主場五比零大勝史篤城，C朗拿度在四分鐘主射罰球破網，卡域克在換邊前建功。貝碧托夫及韋碧克在下半場亦各入一球。C朗拿度到完場前兩分鐘，再憑罰球建功，個人梅開二度。

車路士三比零大勝西布朗。開賽三十四分鐘，保辛華在禁區外放冷箭破網，安歷卡在換邊前連入兩球，作客的車路士最後三比零取勝。

利物浦作客二比零，擊敗保頓。古治上半場廿八分鐘頭槌建功，為紅軍打開紀錄；換邊後，謝拉特到七十三分鐘，接應費蘭度托里斯的傳球，迎頂入網，協助利物浦淨勝兩球。

阿仙奴主場落敗，零比二不敵阿士東維拉。新特蘭作客二比一擊敗布力般流浪。富咸以同樣比數挫敗熱刺。紐卡素與韋根賽和二比二。韋斯咸與樸茨茅夫互交白卷。

皇馬戰華拉度列六將缺陣
資料來源 : 有線電視 -- 15 Nov '08
西甲的皇家馬德里，將會在香港時間今晚作客華拉度列。皇馬今場，將會有六位球員因傷缺陣，包括雲尼斯達萊、洛賓、迪亞拉、迪拉列特，以及後衛比比及梅斯達。有消息表示，假如皇馬今場落敗，球會方面會開除蘇斯達，但蘇斯達在記者會上並沒有正面回應。他更表示，由於雲尼斯達萊缺席這個賽季，會考慮從青年軍提昇貝奴取代其位置。

林柏特賓尼迪斯上月英超最佳
資料來源 : 商業電台 -- 15 Nov '08
車路士中場林柏特和利物浦領隊賓尼迪斯，分別當選上月英超聯最佳球員和領隊。賓尼迪斯帶領利物浦上月四戰全勝，包括作客史丹福橋擊敗車路士，終止對方八十六場主場不敗紀錄。林柏特則在四場賽事射入兩球，他是繼迪高後，第二名在本季取得最佳球員殊榮的車路士球星。

馬納當拿威脅劈炮唔教阿根廷
資料來源 : 太陽報 -- 14 Nov '08
呢位阿根廷球王上任短短十二日，已經同足總主席格蘭當拿吵大鑊，導火線係助教人選問題，兩人拗到面紅耳赤，馬納當拿更激到用辭職威脅足總，雙方合作冇耐就搞成咁，以後實有排煩喇！ 早前馬納當拿應承做國家隊教頭，仲點晒兵兼委任馬斯真蘭奴做隊長，跟手開始準備搵左右手，諗住同當年戰友勒基利拍住上。不過，勒基利同阿根廷足總主席格蘭當拿有牙齒印，後者更公開表明唔妥對方：「我睇佢唔順眼，但呢個係純粹私人問題！」

馬納當拿向來要面，今次格蘭當拿畀面色佢睇，於是馬上作出反擊：「勒基利係個好好o既人選，希望『有o的人』會明啦！」呢位球王玩到好絕，有傳如果足總唔接納佢要求，佢會考慮辭職！ 不過，據悉馬納當拿態度開始軟化，阿根廷作客對蘇格蘭已經決定親自督師。不過，若然格蘭當拿企硬唔畀佢「渣」弗，肯定仲有大把手尾跟！

國米斟阿古路打友情牌
資料來源 : 太陽報 -- 14 Nov '08
國際米蘭前鋒阿祖安奴同球隊o既關係愈來愈僵，日前再次缺席操練，有傳會方已對佢失去耐性，準備放棄呢位巴西國腳，並收購馬德里體育會射手阿古路作取代。國米同曼城都想將呢位阿根廷國腳收歸旗下，但馬體會揚言冇五千萬歐元轉會費唔放人。不過國米會長莫拉堤同阿古路o既岳長大人馬納當拿私交甚篤，而且可能將阿祖安奴加入交易o既一部分，無疑令國米o系呢場爭奪戰，處於優勢。

C朗嗌價196萬周薪續約
資料來源 : 東方日報 -- 14 Nov '08
今夏扭計轉會皇馬o既C朗拿度，難得曼聯同班球迷唔嬲佢，照計應一條心效忠紅魔鬼先至o岩，點知呢條麻煩友轉頭又搞事，日前要求曼聯打破薪酬上限加佢人工至周薪十七萬鎊，仲話要咁高薪酬全因配合番佢o既球壇地位喎，睇o黎契爺費格遜又有排煩o勒！

其實「豆」緊十二萬鎊周薪o既C朗，已係現時曼聯最高薪球員，不過睇錢做人o既佢似乎仲未心足，更獅子開大口貪得無厭。日前C朗經理人佐治文迪斯話：「C朗係當今球壇最Top球員，o黎緊o既金球獎同世界足球先生殊榮又肯定有佢份，曼聯應該大幅加C朗人工，襯番佢o既球壇地位，希望可以盡快同會方展開談判。」

早排夏格維斯做完手術要提早收咧，C朗呢頭又嗌加人工，費Sir已經夠晒煩。咁仲未算，尋日皇馬前鋒雲尼斯達萊證實膝傷嚴重，今季無緣復出，「銀河艦隊」為填補「雲佬」空缺，打算於明年一月斟泰維斯過檔，咁多樣o野殺到埋身，相信費格遜都相當頭痕。

雲尼斯達萊接受手術將錯過今季餘下賽事
資料來源 : 商業電台 -- 14 Nov '08
效力皇家馬德里的荷蘭前鋒雲尼斯達萊，在美國科羅拉多州醫院，接受右膝蓋手術，皇馬表示，醫生在手術時，發現雲尼斯達萊的傷勢，較原初估計嚴重，手術後需時六至九個月時間康復，會錯過今季餘下賽事。三十二歲的雲尼斯達萊，零六年由曼聯轉投皇馬，當年射入二十五球，而上季亦射入十六球，協助皇馬連續兩年贏得聯賽錦標。

杜奧巴硬幣擲球迷被警方調查
資料來源 : 商業電台 -- 14 Nov '08
倫敦警方和英格蘭足總正調查車路士前鋒杜奧巴，將硬幣擲向球迷的事件。在星期三車路士主場對般尼的聯賽盃，杜奧巴慶祝入球期間，有球迷向他擲硬幣，杜奧巴將錢幣回擲向觀眾。球證當時立即以黃牌警告杜奧巴，杜奧巴賽後亦表示後悔並向球迷道歉。

迪比亞路向柏天尼薛高偷師
資料來源 : 太陽報 -- 13 Nov '08
正所謂薑愈老愈辣，三十四歲o既迪比亞路o的罰球就愈射愈勁！呢位祖雲達斯隊長過去三場波都射入罰球，效力「老婦人」十五年間總共省入四十個自由球，咁鬼犀利，皆因佢自細就狂煲柏天尼、薛高同馬納當拿o既錄影帶偷師！

上場聯賽祖記贏基爾禾兩粒，迪比亞路罰球建功賀「牛一」梗係開心啦，不過當佢主射罰球時全場球迷都靜晒，呢個場面令祖記會長吉利諗起昔日o既罰球大師薛高：「我記得以前逢親薛高射罰球，全場球迷梗會靜晒，迪比亞路真係有佢o既影子。」

被問到射罰球有咩心得，迪比亞路就話：「我細細個就狂煲薛高、柏天尼同馬納當拿o既錄影帶，我諗睇得多真係會有用，不過最緊要都係透過不斷o既練習o黎提升自己o既罰球功力。」

今季已經轟入八球o既迪比亞路，職業生涯真係乜盃都捧過，唯獨爭個金球獎未「羅」過，日前佢老人家就向傳媒自爆好恨o系掛靴前「羅」番一次金球獎，等第日老o左都有個美好回憶。

夏格維斯提早收咧
資料來源 : 太陽報 -- 13 Nov '08
曼聯中場夏格維斯入「魔」後抖多過踢，球迷o黎緊更加有排見唔到佢，因為佢近日飛去美國接受膝部手術，今季餘下賽事都唔能夠再上陣。呢位英格蘭國腳十五個月前以一千八百萬鎊轉會費，由拜仁慕尼黑加盟曼聯，但長期受傷患困擾，至今只為球隊以正選上陣廿五次，可以話係曼聯近年最失敗收購之一。

巴西兵篤背脊曉士面臨炒魷
資料來源 : 東方日報 -- 11 Nov '08
季初得到阿拉伯財團注資，目標係稱霸全球o既曼城，點知原來貨不對辦，o系經過前晚不敵熱刺後，就連英超位置都危危乎。據聞領隊曉士既受班主文梳亞質疑，仲畀陣內巴西三子背後插多刀，聽日佢飛去阿布札比若果傾唔掂數，隨時會即刻被炒！

曼城近九場聯賽兩勝一和六負，前晚輸畀熱刺之役，更加有隊長李察鄧尼同基爾臣費南迪斯同時被逐，球隊想翻身，睇怕短期之內都唔易。其實曼城個阿聯酋班主文梳亞對曉士領軍有多少懷疑，o系對熱刺賽前，已經派出主席阿姆巴拉克去曉士屋企面談了解球隊情況，事後曉士就話會面情況良好，但有指曉士要o系周三飛去阿聯酋首都阿布札比同文梳亞解畫，但能唔能夠講掂數，就真係好難講。

同時，包括羅賓奴、艾蘭奴同祖奧三個巴西兵，對曉士o既管理手法極為不滿，o系曉士背後狂「篤背脊」，相信曉士即使走得甩唔炒，都捱唔到出年一月。